O BLOG DE AULA DE LUIS

DOMANDO ELECTRÓNS

2012-01-17T00:24:00.006+01:00

Nestes últimos días estivemos en 6ºB domando electróns. Fixémolos andar grazas a xeradores (pilas de petaca) e conducímolos por cables (condutores) ata receptores (lámpadas) onde lles obrigamos a facelas lucir. Mantiñamos o control mediante un ou varios interruptores. A continuación botamos imaxinación e saíron cidades, faros, muiños, campos de fútbol, helicópteros...
Na parte dereita do blog en "AS NOSAS IMAXES", clicade sobre "Traballos de electricidade 6ºB (2012)" para poder apreciar os nosos logros.

UNHA LEMBRANZA

2011-12-16T10:00:00.000+01:00

Ao longo dos últimos meses o blog ven recollendo os comentarios dos alumnos deste curso, pero tamén dos pasados. Cos deste curso teño o pracer de falar a diario, pero boto en falta poder agradecer os comentarios dos que xa estades no instituto. Como seguides formando parte deste colexio e do corazón deste mestre, non quixen deixar pasar a ocasión do Nadal e pintei esta árbore cos vosos nomes. Lembrei individualmente a cada un. Gracias por seguirnos. Feliz ano e feliz instituto.
Unha calorosa aperta.

SOTAVENTO

2011-12-13T18:27:00.002+01:00

O pasado día 12 visitamos o parque eólico experimental de Sotavento cerca de As Pontes. Era un día fresco, pero non frío a pesar da altitude (uns 700 metros). Neste parque trabállase sobre diferentes enerxías alternativas respetuosas co mediambiente: enerxía eólica, enerxía fotovoltaica... Na visita tivemos a oportunidade de coñecer como funciona un aeroxerador, as súas partes e os mecanismos de control. Tamén vimos diferentes paneis que nos axudaron a mellorar os nosos criterios sobre aforro enerxético (lámpadas de baixo consumo ou de leds fronte ás clásicas de filamento; apagar os aparellos eléctricos non utilizados e desenchufalos...). Na parte final, visitamos unha casa "bioclimática" con tódolos adelantos que permiten obter a enerxía do ambiente sen deterioralo.
-Para facer unha visita virtual a Sotavento, clica no enlace.
-Para ver as nosas fotos, clica no lateral do blog no apartado "As nosas imaxes", "Sotavento 2011"

PRESENTACIÓNS PRIMEIRO TRIMESTRE 2011 - 2012

2011-12-01T16:11:00.001+01:00

Hoxe comezamos en 5ºB e 6ºB a tanda de presentacións do primeiro trimestre. Era a primeira vez que os alumnos destes cursos as facían. Un verdadeiro reto que superaron con moito éxito. Os compañeiros que as valoraron tamén o fixeron moi ben; outro éxito do que debemos estar moi orgullosos. Tan importante é o feito de facelas e defendelas publicamente con calidade, como o de escoitalas con atención, comentalas e valoralas con respeto e xustiza. Noraboa a todos.
Para ver as imaxes clicade, no lateral do blog no apartado "As nosas imaxes", o enlace "Presentacións 1º trimestre 2011-2012"

22 DE NOVEMBRO, DÍA INTERNACIONAL DA MÚSICA

2011-11-28T21:16:00.005+01:00

O pasado venres conmemoramos no cole o Día Internacional da Música. Moitos alumnos e o profe Paulo prepararon un estupendo concerto ao que poidemos asistir os alumnos e profes do cole. Noraboa a todos por este extraordinario traballo. O protagonismo leváronno os compañeiros de sexto. Foron os de sexto os que o presentaron e moitos dos músicos pertencían tamén a este nivel. O ano que ven seremos os de quinto os protagonistas absolutos. Para ir preparándonos, os de quinto xa tivemos as nosas representantes. Patricia (guitarra), Julia (guitarra), Clara (violín) e Melanie (órgano), formaron un magnífico cuarteto.

VISITANDO O MUSEO PEDAGÓXICO DE GALICIA

2011-11-16T21:15:00.005+01:00

Hai uns días tivemos a ocasión de visitar o MUPEGA. Nel coñecimos moitos dos aspectos da escola do último século e dos xogos con que disfrutaban os nosos avós. Comprobamos as enormes diferencias coa escola de hoxe, pero tamén apreciamos moitas semellanzas. Unha escola que nos chamou moito a atención foi a dos "indianos"; aqueles emigrantes de comezos do século XX que enviaban cartos desde América para construir escolas en Galicia para que os veciños do seu povo tivesen a oportunidade de formarse.
Na imaxe superior podedes ver, en primeiro plano, algunhas alumnas moi aplicadas nunha aula de época.
Para visitar, virtualmente, o MUPEGA, clicade no enlace. Enlace

A DIVISIÓN

2011-11-13T12:46:00.011+01:00

Cando comezamos 5º e 6º de Primaria, repasamos as operacións matemáticas básicas: suma, resta, multiplicación e división. Esta última, as veces, complícasenos un pouco xa que necesita que dominemos as aotras e que teñamos ben interiorizada a mecánica de facer divisións. Este vídeo pode axudarnos a adquirir esa mecánica, probade.
Para practicalas podes facelo no seguinte enlace: Enlace
Para comprobar as que fas, utiliza este outro: Enlace 2

VÉMONOS NO CAMIÑO

2011-06-15T20:12:00.004+02:00

Rematou a primaria, deixades o cole e con el a nenez, unha etapa maravillosa. Agora vos adentraredes nun novo período apaixoante, a adolescencia, que transcurrirá nun novo entorno, o instituto. Abrides un novo capítulo da vosa vida cheo de novas e magníficas experiencias. Entrade nel coa convicción de que vos irá moi ben. Suporá novos retos e dificultades, sen dúbida, pero estades preparados para superalas. Confiade sempre, incondicionalmente, en vós mesmos. Non sintades nostalxia do que deixades atrás, mais nunca o esquezades. Cumpride co primeiro mandamento que temos os seres humanos, buscar incansablemente a felicidade, pero non olvidedes o segundo, tan importante como o primeiro, colaborade intensamente a que sexan tamén felices as persoas do voso entorno.
Recibide unha agarimosa aperta de quen tivo o pracer de camiñar ao voso lado nos últimos dous anos.
Vémonos no camiño.

RIZANDO O RIZO

2011-06-11T18:00:00.002+02:00

Nestes días estamos rematando as presentacións de coñecemento do medio do último trimestre. Desta volta tivemos menos tempo ca nunca (mes e medio de "trimestre") e para colmo os temas de investigación non estaban no libro na maioría dos casos. Todo un reto que superamos. Non podía ser menos, xa temos nivel de profesionais.

EXTRAORDINARIA ESTREA DA FRAUTA MÁXICA

2011-06-10T13:20:00.007+02:00

Hoxe asistimos á deliciosa estrea da "Frauta máxica" interpretada magnificamente por: Raúl (Tamino), Lucía (Pamina), Alicia (Raiña da Noite), Daniel (Papageno), Sergio (Sarastro), Paula, Gema e Stela (Damas da Raiña) e por un fenomenal equipo de voces a coro. Todo dentro dun escenario sorprendente feito co esforzo das profes: Chisa, Elena, Ana Infante e outros profes e alumnos. A obra foi dirixida magnificamente polo profe Paulo.
Disfrutamos moito, permanecimos sen pestanear durante toda a representación. Todo un pracer.
Grazas polo voso esforzo.
Enlace

O ENCORO DE CECEBRE

2011-05-26T23:50:00.013+02:00

Hai uns días estivemos de paseo polos arredores do encoro de Cecebre. Alí visitamos a aula de interpretación do encoro, a veira do encoro vendo algunhas aves, a fraga de Cecebre e a casa de Wenceslao Fernández Flórez. Cantos descubrimentos nun só día e tan perto de nós. As veces non hai que ir moi lonxe para ampliar os horizontes.

VISITA Á DOMUS

2011-03-18T18:40:00.008+01:00

Hoxe pasamos a mañá visitando a DOMUS. Unha xornada diferente. Os museos científicos teñen a virtude de estimular a nosa curiosidade. Neste, en particular, as sorpresas están relacionadas co corpo e a mente dos seres humanos, un tema sempre interesante. Os humanos sentimos unha enorme curiosidade por nós mesmos. Somos "autocotillas". As fotos témolas, coma sempre, no lateral do blog.

Enlace

UNHA AGARIMOSA APERTA, VECIÑOS DO OUTRO LADO DO MUNDO

2011-03-13T23:28:00.018+01:00

O venres, día 11 de marzo, espertamos coa noticia dun forte tremor nas costas de Xapón. Ainda descoñecíamos o alcance da noticia. Lentamente chegaban os datos: 8,9 na escala de Richter ¡Que barbaridade!. Forzosamente tiña que haber moitas vítimas a pesar da preparación de Xapón para os tremores. Non quedaba a cousa aí, despois do terrorífico tremor chegou o tsunami e, por se fose pouco, dúas centrais nucleares afectadas e con gravísimos problemas. Non sei que nos deixou máis impresionados, a forza todopoderosa da natureza ou o risco dunha nube radiactiva, producida por unha máquina humana, sobrevoando as cabezas de millóns de persoas. ¿Son imprescindibles as centrais nucleares? ¿Podemos crear un mundo máis seguro?.
Unha agarimosa aperta, amigos xaponeses.
Enlace 1 Enlace 2 Enlace 3 Enlace 4 Enlace 5

SOMOS BOS OBSERVADORES?

2011-02-15T18:22:00.004+01:00

Parece que cando estamos concentrados nalgunha cousa, o noso cerebro desprecia moitos datos que recollen os sentidos, pero que desatende porque lle parecen pouco importantes ou porque considera que o distraen do tema principal. Neste video podedes comprobar, de xeito sorprendente, esta afirmación.

LEONARDO E O RENACEMENTO

2011-02-08T16:56:00.015+01:00

O Renacemento, un extraordinario período de superación da triste e longa Idade Media. Novas ideas, nova visión do mundo. Todo comeza a cambiar. Falar do Renacemento é falar de Leonardo da Vinci. Leonardo encarna este espírito como ninguén. Invítovos a coñecelo.

Open publication - Free publishing - More renacimiento

EXPERIMENTANDO CO VIDEO

2011-01-30T19:49:00.022+01:00

Nestes últimos días decidimos experimentar co video aproveitando varias sesións de atención educativa. Utilizamos os nosos coñecementos de electricidade e magnetismo e decidimos explicar, á nosa maneira, como funcionan algúns circuitos e como se pode facer unha brúxula. Aquí o tedes. Xa nos diredes que vos parece. Os valentes foron: Lucía, Alba, Aldara Dubra, Paula Añón, Iván, Martín, Xoan, Nathalia, Irene, Andrea e Paula Carracedo.

VIDEOS DE HISTORIA

2011-01-25T11:31:00.005+01:00

Agora que iniciamos a Idade Moderna en coñecemento do medio, as imaxes e os videos poden ser de moita axuda. A revista dixital Artehistoria posúe unha boa colección de videos. Moitos deles poden ser facilmente comprensibles e vos poden axudar a entender acontecementos e situacións históricas dun xeito ameno e doado.

Enlace

AS IDADES MODERNA E CONTEMPORÁNEA

2011-01-22T00:35:00.009+01:00

Comezamos trimestre e comezamos novos temas. Toca iniciar o estudio da historia. Teremos contacto, neste curso, coa Idade Moderna e coa Idade Contemporánea. Falaremos da formación de España, das viaxes transoceánicas, do Renacemento, dos reis autoritarios e absolutistas, dos austrias e dos borbóns, da revolución industrial...
Comezamos tamén coa preparación de presentacións relacionadas con estes temas e necesitamos fontes de información útiles e comprensibles. A páxina web que vos propoño visitar contén información deste tipo. Pertence ao proxecto Clarión e suxírovos que non a perdades de vista, pode ser moi útil.

Enlace

A CÁMARA ESCURA E O OLLO

2011-01-16T10:49:00.006+01:00

Estas vacacións de nadal foron moi fructíferas e moitos as utilizaron (entre outras cousas) para elaborar proxectos de electricidade e óptica seguindo os coñecementos adquiridos na clase. Entre os traballos de óptica feitos queremos destacar as cámaras escuras (as antecesoras das cámaras fotográficas e simuladoras do ollo humano). Foron feitas con caixas de cartón, lupas (lentes converxentes) e pantalla de papel vexetal. Na marxe dereita do blog tedes a posibilidade de contemplar algúns dos nosos traballos.

"OS CHISPAS"

2011-01-11T16:26:00.006+01:00

Nos últimos días do pasado trimestre abordamos o tema da electricidade. Como non quixemos quedarnos só coa teoría ou coa práctica virtual (vos recomendamos o programa crocodile clips), decidimos pasar á acción e puxémonos a deseñar aplicacións prácticas de circuítos en serie e en paralelo. Utilizamos conductores, interruptores, leds, electroimáns... Non nos faltou imaxinación. Os resultados foron, efectivamente, prácticos e moi chulos. Podedes atopalos na banda lateral dereita do blog.

AS MÁQUINAS

2010-11-18T23:49:00.007+01:00

As máquinas, tan útiles na vida diaria, aproveitan os nosos coñecementos da física recopilados ao longo da historia da ciencia. Utilizamos máquinas desde os tempos máis remotos. Comezamos por unha panca e terminamos, ata agora, polos ordenadores e os robots. Esta páxina, á que podedes acceder clicando no enlace, permitirá achegarvos a este mundo de utinsilios.

Enlace

OUTRA FORMA DE FACER PRESENTACIÓNS

2010-11-14T20:44:00.009+01:00

Estamos afeitos a facer as presentacións de Coñecemento do Medio que propoñemos na clase seguindo o noso propio deseño, pero hai outras moitas formas de facer presentacións. Nesta ocasión vos propoño visitar unha páxina do CEIP Galán de Oseiro-Arteixo onde están aloxadas unhas presentacións feitas dun xeito moi orixinal polo mestre Juan Calo. Están relacionadas co funcionamento dos aparellos e sistemas do corpo. Se hai alguén que se atreva a facer algo parecido, aí vai un reto. Xa me diredes.

Enlace

ACCIDENTE NA MINA S. JOSÉ DE CHILE

2010-10-13T16:42:00.005+02:00

Nestes días asistimos a un acontecemento conmovedor. Todo o planeta está pendente do rescate de 33 mineiros chilenos soterrados desde o pasado 5 de agosto a causa dun derrubamento na mina. Os mineiros atopanse a 700 metros de profundidade e todo o pobo chileno loita por sacalos do seu encerro. Asombra a xenerosidade e o empeño que a especie humana pode poñer en rescatar a 33 persoas e ao mesmo tempo fracasamos rotundamente cando pelexamos nas guerras, sempre inútiles, ocasionando miles de víctimas.

Enlace 1 / Enlace 2 / Enlace 3

O SISTEMA SESAXESIMAL

2010-05-23T22:45:00.004+02:00

Estamos moi familiarizados co sistema decimal. Xa sabedes, o de dez unidades fan unha decena, dez decenas fan unha centena, etc. Agora toca afacernos ao sistema sesaxesimal, o sistema que permite traballar coas unidades de tempo e os ángulos. Como sei que algúns tedes dificultades con este sistema, suxirovos navegar por esta páxina. Ten explicacións e exercicios. Clicade no enlace.
Enlace

LONXITUDE, MASA E VOLUME

2010-05-02T21:29:00.004+02:00

Desde o CEIP San Bernardo de Canarias propóñenos unha interesante páxina para repasar os cambios de unidades de lonxitude, masa e volume. Unha atractiva páxina que nos axudará a fixar definitaivamente algúns aspectos do Sistema Métrico Decimal.

Enlace

AS MATEMÁTICAS DA NATUREZA

2010-04-25T16:10:00.012+02:00

Fibonacci foi un matemático do século XIII que descubríu uns números (0,1,1,2,3,5,8...) onde cada un deles obtense da suma dos dous anteriores. Curiosamente esta serie de números está presente en moitos aspectos da natureza. Neste vídeo, fabulosamente realizado, podemos apreciar esta interconexión entre as matemáticas e o mundo natural. Inventamos as matemáticas ou só as descubrimos?. Disfrutádeo, é pura poesía.

AS MATEMÁTICAS, UN ENTRETEMENTO MÁIS

2010-04-20T19:20:00.004+02:00

Nesta estupenda páxina feita por Juan García Moreno, un mestre do CEIP Blas Infante de Lebrija (Sevilla), poderedes pasar un bo rato exercitando o coco. Aínda que a algún lle pareza raro, as matemáticas poden ser moi divertidas.
Enlace

ECOSISTEMAS E BIOMAS

2010-04-11T23:59:00.008+02:00

O noso querido planeta non é uniforme. Nel podemos atopar ambientes diferentes moi relacionados co clima que condiciona a vexetación e a fauna de cada lugar. En cada ecosistema e bioma habitan seres moi diferentes moi ben adaptados ás condiciones dese ambiente. Para saber máis clica nos enlaces seguintes.
Enlace 1 Enlace 2 Enlace 3 Enlace 4 Enlace 5

A BIODIVERSIDADE

2010-04-08T23:43:00.003+02:00

Sabedes que estamos no Ano Internacional da Biodiversidade e con motivo disto, desde a biblioteca do colexio propóñenos realizar unha webquest. Unha webquest é unha tarefa de investigación sobre un tema na que, resumindo, temos que contestar unhas preguntas consultando recursos que se proporcionan na propia webquest. Para máis información clicade sobre o enlace.
Enlace

A PIZARRA DIXITAL

2010-04-04T22:45:00.002+02:00

Hai uns días recibimos a visita dunha reporteira e dun fotógrafo da Voz de Galicia no noso colexio. Estaban interesados na utilización das pizarras dixitais que temos no cole e que compartimos como xa sabedes. A reportaxe foi publicada no diario o pasado día dous, pero tamén podedes lela no diario dixital da Voz de Galicia clicando no enlace. A imaxe foi tomada na nosa aula.
Enlace

A ORIXE DA NOSA ESPECIE

2010-03-22T23:47:00.003+01:00

O pasado fin de semana tiven a posibilidade de visitar a estupenda exposición "Atapuerca e a evolución humana" que temos temporalmente na Coruña, en Palexco. Alí atopei moitos pais acompañando aos seus fillos; todos disfrutando desta apasionante aventura da orixe e evolución da humanidade. No enlace seguinte podedes chegar á páxina desta exposición. Poderedes ver (ao final da páxina) imaxes suxerentes da mostra, pero eu vos propoño visitala. Non vos quededes con sucedáneos, vivídea en directo.
Enlace

A REVOLUCIÓN PACÍFICA DE DARWIN

2010-03-14T13:10:00.008+01:00

O pasado martes os alumnos de quinto fomos á Casa das Ciencias. Alí tivemos a ocasión de facer un traballo sobre a figura de Darwin, a súa extraordinaria viaxe no Beagle e a súa innovadora teoría sobre a evolución concretada no libro "A Orixe das especies". Darwin,un magnífico observador, co seu traballo minucioso, que prolongou durante moitos anos, fixo que a sociedade do momento tivese que reflexionar sobre as antigas crenzas respecto aos seres vivos e sobre a mesma especie humana.
Enlace

8 DE MARZO, DIA DA MULLER

2010-03-08T18:09:00.004+01:00

Hoxe celebramos o día da muller. Facémolo porque aínda é necesario que reflexionemos periodicamente sobre o feito incongruente de que recoñecemos nas leis a igualdade de homes e mulleres, pero na vida real; cobran menos caos homes polo mesmo traballo; son elas as que coidan aos nosos maiores; van máis á universidade, pero teñen menos postos de responsabilidade; son elas as que se ocupan preferentemente da educación dos fillos... Gustaríanos que deixase de celebrarse o día da muller porque isto significaría que nada do anterior ocorre. A que non hai día do home?

OS DECIMAIS

2010-03-01T13:39:00.004+01:00

Estamos nesta temporada a voltas cos decimais. Xa sei que a algúns lles levanta dor de cabeza. Para tratar esta doenza, tan frecuente, temos algúns tratamentos bastante efectivos: estar atentos na clase, practicar moito cos exercicios que se propoñen e visitar e realizar as actividades destas páxinas que vos suxiro. Seguindo estes tratamentos, o pronóstico da enfermidade será moi favorable.

Enlace 1 Enlace 2

30 DE XANEIRO, DÍA DA PAZ

2010-01-28T22:06:00.006+01:00

Kseniya Simonova foi a gañadora da edición Ucraniana de "Tes talento". Na final, pintou en directo unha animación da terrible invasión alemana de Ucrania durante a Segunda Guerra Mundial. Usou os seus dedos e unha superficie con area.
Mirade e escoitade, nada disto pode voltar a suceder. Nas nosas mans está.

A REPRODUCCIÓN DOS ANIMAIS

2010-01-20T22:44:00.009+01:00

A reproducción é un mecanismo establecido pola natureza para que as especies de seres vivos perduren centos de miles e ata millóns de anos, aínda que os individuos desaparezan. Nestes enlaces poderás achegarte aos diferentes procedementos que utilizan os animais para reproducirse.
Enlace 1

OS VEXETAIS, PRIMEIRO ESLABÓN DA CADEA ALIMENTARIA

2010-01-17T23:49:00.006+01:00

Os vexetais cumpren unha función imprescindible na natureza. Realizan a fotosíntese, é dicir, son capaces de converter sustancias ou enerxías aparentemente sen interese (auga, sales minerais, luz e dióxido de carbono) en alimento. Este alimento permite vivir aos herbívoros e estes a os carnívoros. Os vexetais son moi variados como podemos ver na páxina á que podemos chegar co enlace seguinte.

Enlace 1 Enlace 2

E CHEGARON OS ANIMAIS

2010-01-17T14:36:00.013+01:00

O mundo dos animais é sempre do voso gusto. Indica que tedes unha enorme curiosiadade pola natureza, que vos sentides parte dela e que polo tanto sodes conscientes da enorme importancia que ten para todos conservar ese inestable equilibrio do noso planeta que permite a vida.
Os enlaces que seguen conducen a páxinas que poden satisfacer algunhas das innumerables preguntas, que seguro que vos facedes.

Enlace 1 Enlace 2 Enlace 3

A CÉLULA, OS TECIDOS...

2009-12-04T23:26:00.007+01:00

Nestas páxinas podemos achegarnos ao mundo da organización dos seres vivos. Tódolos seres vivos están formados por células. As células asocianse, nos organismos pluricelulares, en tecidos, órganos, apaerellos e sistemas.
Enlace 1 Enlace 2

A IDADE MEDIA

2009-11-17T23:00:00.004+01:00

Nesta páxina que vos propoño visitar, podemos achegarnos a moitos dos aspectos que caracterizaron a Idade Media. Os visigodos, o feudalismo, o nacemento da burguesía, a España cristíá e musulmana, o románico e o gótico...
Clicade sobre o enlace para metervos neste mundo perigoso e asombroso desta escura etapa histórica.

Enlace

CAE ROMA, NACE A IDADE MEDIA

2009-10-21T20:43:00.005+02:00

O deterioro da organización do Imperio Romano facilitou a entrada de pobos do norte de Europa, os bárbaros. A desaparición do poder central romano fixo que os bárbaros se organizasen en pequenos reinos. Comezaba a Idade Media.
Propóñovos que visitedes esta magnífica páxina web do colexio Bretón de los Herreros de Logroño onde poderedes apreder moitos aspectos deste novo período.

Enlace

REPASANDO A DIVISIÓN

2009-10-07T18:05:00.004+02:00

Xa sei que sabedes dividir (que ninguén se ofenda) pero, por se alguén aínda ten dificultades con esta operación, aquí vos queda un enlace a unha páxina onde se pode aprender e exercitar a división.

Enlace

O GRAN IMPERIO DA IDADE ANTIGA

2009-09-28T16:34:00.015+02:00

A cultura do imperio romano afectou a tódalas ribeiras do Mediterráneo. Este mar interior e relativamente pequeno facilitou as comunicacións marítimas entre es súas ribeiras. O Imperio Romano, eficaz e organizado, conquistou toda a beiramar meditarránea e impuxo a súa cultura. Hoxendía (15 séculos despois da súa desaparición) seguimos a falar idiomas (italiano, francés, español, galego, catalán, portugués) con profundas raíces no idioma imperial, o latín.
Aquí vós deixo varios enlaces a páxinas atractivas relacionadas con este período histórico:
Enlace 1 Enlace 2 Enlace 3

OS CELTAS, UN POBO PRERROMANO

2009-09-27T17:23:00.012+02:00

Antes da chegada dos romanos, Galicia estaba habitada polos celtas, un pobo de orixe centroeuropeo. Os celtas eran agricultores e gandeiros; traballaban os metais e eran moi bos ourives. Vivían en pequenos poboados, os castros, dos que temos un bo número en Galicia como o de Santa Tegra (Pontevedra). Clica no enlace e poderás ver un vídeo explicativo das características destes poboados.

Enlace

EQUINOCIO E SOLSTICIO

2009-09-23T16:59:00.007+02:00

Con frecuencia pensamos e algúns libros recórdanolo, de xeito inexplicable, que o Sol ponse cada día por un punto do horizonte ao que lle chamamos oeste. A realidade, que sempre remata por impoñerse, indica que esta afirmación é inexacta. As imaxes que nos acompañan nesta ocasión demostran esta inexactitude. As dúas están obtidas desde o mesmo lugar (Faro de Mera) e no momento do solpor. A superior é do 22 de setembro (equinocio de outono) e a inferior é do 21 de xuño (solsticio de verán). A diferencia entre elas fala por si mesma.

O NOSO PASADO REMOTO

2009-09-16T23:21:00.004+02:00

Comezamos o noso libro de Coñecemento do Medio repasando o período máis antigo do noso pasado. O libro adica todo un tema á Prehistoria pero como somos moi curiosos e queremos aprender máis, aquí vos deixo unha páxina para poder completar os vosos coñecementos. Para chegar a ela clicade aquí.

BOA VIAXE

2009-06-22T10:27:00.005+02:00

Xa rematou a primaria, xa rematou o camiño que compartimos. É tempo de novas metas, desafíos, instituto, compañeiros, profes... Todo vai ser novo. Comezades outro capítulo desta maravillosa aventura da vida. Se tedes algo de medo, tranquilos, confiade en vós mesmos (sempre). Se sentides nostalxia, mirade para adiante, mais non esquezades. Sede optimistas, calquera tempo que veña será mellor, seguro. Confiade nas vosas capacidades e disfrutade. Non esquezades que a primeira obriga dun ser humano é ser feliz e facilitar a felicidade dos outros.

Recibide unha agarimosa aperta de quen aprendeu moito de vós. Vémonos no camiño.

Luis Peña

O LIBERALISMO E A REVOLUCIÓN FRANCESA

2009-05-27T13:26:00.010+02:00

Os Reis Católicos foron uns reis autoritarios. Acumularon poderes e controlaron á nobreza. Os nobres feudais perderon influencia e gañouna a monarquía. Con isto desaparecía a Idade Media e comezaba outra etapa, a Idade Moderna. Os nosos reis, primeiro os da casa de Austria e máis tarde os da casa de Borbón, seguiron na liña das monarquías autoritarias que evolucionaron a absolutistas. O rei absolutista e a nobreza da súa corte pertencían a unha casta de privilexiados que exercían o poder e eran propietarios da maior parte do territorio. A casta non privilexiada, o resto dos cidadáns, vivía en condicións moito peores, as veces lamentables. Esta situación de inxustiza motivou un cambio de mentalidade na sociedade que deu lugar ao liberalismo, unha corrente de opinión que ía no camiño da democratización e recortaba os poderes do rei e dos nobres. Este cambio nalgúns paises foi moi duro dando lugar a auténticas loitas terribles entre privilexiados e non privilexiados como ocurríu en Francia.
A Marsellesa, o himno de Francia, lémbranos a violencia desta etapa. Lémbranos tamén que as situacións de inxustiza poden dar lugar a situacións de violencia onde todos perdemos. Un mundo xusto é un mundo en paz.

17 DE MAIO, DÍA DAS LETRAS GALEGAS

2009-05-19T17:18:00.006+02:00

A Real Academia dedica o Día das Letras Galegas 2009 a Ramón Piñeiro. Este intelectual de Láncara (Lugo) foi unha figura relevante do galeguismo. Pelexou, coma outros moitos, polo mantemento dunha fala maltratada pola historia. Isto ven da época da loita pola sucesión en Castela, cando a futura raiña Isabel I loitaba polo trono coa súa contrincante, Juana la Beltraneja. Os galegos decidimos poñernos do lado da Beltraneja e perdimos. A Raiña Isabel non nos perdonou que defendéramos á súa inimiga. A nobleza de Castela impúxose sobra a nosa e trouxo consigo o seu idioma. Desde entón, necesitamos que persoas comprometidas co noso idioma como Ramón Piñeiro, nos recorden que somos galegos e que temos unha fala.
Aquí tedes un enlace ao Arquivo Sonoro de Galicia, onde poderedes escoitar a voz de Ramón.
Enlace

UNHA DE HISTORIA... MARCHANDO!

2009-05-19T00:13:00.005+02:00

Nestes últimos días estamos a estudar a época dos Austria e do Barroco. Nesta páxina, que vos propoño visitar, atoparedes información das diferentes etapas históricas e tamén da que estamos traballando. A páxina é do CEIP Mariano Castillo (Villamayor).

Para chegar a ela, clica aquí.

JANE GOODALL NA CORUÑA

2009-05-13T16:52:00.016+02:00

Onte pola tarde algunhas persoas tivemos o privilexio de escoitar a Jane Goodall no Pazo da Ópera da Coruña. Pero Jane non é ningunha concertista, Jane é unha primatóloga, unha científica que estuda o comportamento dos chimpancés (primates), a especie máis parecida ao ser humano. Faino desde hai cincuenta anos e faino nas selvas da República Democrática do Congo, non nun zoolóxico. Jane contaxia o seu profundo amor pola natureza a calquera que desexe escoitala.

Durante eses cincuenta anos de estudo, comprobou como as selvas onde viven os chimpancés deteriorábanse lenta pero progresivamente pola acción humana e o número de chimpancés baixaba de 1.000.000 a 300.000 exemplares.
Ante esta preocupante situación, Jane decidiu viaxar constantemente por todo o mundo alertándonos do perigo que corremos se estragamos o noso planeta porque non só se perde o habitat dos chimpancés e dos animais salvaxes, deteriorase tamén o noso habitat (os bosques dos chimpancés producen osíxeno e consumen dióxido de carbono)e non temos un planeta alternativo a onde ir.
Para saber máis desta extraordinaria muller e do seu traballo, deíxovos un enlace á web do Instituto de Jane Goodall e un vídeo.

O lema de Jane é:
"Cada indivíduo conta...
cada un pode marcar unha diferencia...
Cada día..."
(Que dito doutra maneira: O que fai cada persoa, conta. Cada acto que fagamos en favor da natureza, conta.)

ENTRANDO NA IDADE MODERNA

2009-05-08T10:46:00.005+02:00

Esta última temporada estamos estudando o comezo da Idade Moderna. O Renacemento, os Reis Católicos, a unificación do noso estado, a imprenta de Gutemberg e o descubrimento de América, representan a entrada nesta nova etapa. A páxina, que hoxe propoñemos para visitar, ten que ver coa figura de Colón, un atrevido aventureiro (bo coñecedor do mar e da cartografía) que dasafiou o medo e a inmensidade atlántica.

Para chegar á páxina clica aquí.

TRABALLANDO COS ÁNGULOS

2009-05-07T10:20:00.005+02:00

Desde hai uns días estamos a traballar cos ángulos e a súa medida. Debuxamos ángulos, medìmolos, clasificámolos, sumámolos e restámolos... En fin, que xa toleamos un pouco con eles. Para que vos sexa máis doado entendelos e utilizalos, propóñovos unha páxina que nos vai facilitar moito as cousas.

Para chegar a ela clicade aquí.

QUENTANDO MOTORES

2009-04-02T15:43:00.003+02:00

Hoxe comezamos a tanda de presentacións do terceiro trimestre. Os temas propostos polo profe son algo máis difíciles que os dos trimestres anteriores. Él di que xa somos expertos e que hai que subir o listón (¡COMO SE PASA!). O caso é que tivemos que debater nos equipos a presentación que escollíamos e agora toca poñerse a investigar. Xa vos iremos contando.

CONCERTO NO AUDITORIO

2009-03-31T19:24:00.005+02:00

Esta mañá fomos ao auditorio da Coruña a escoitar e ver aos SPANISH BRASS. Un grupo de cinco músicos de vento-metal que nos mantiveron entretidos durante algo máis dunha hora. Utilizaron trompetas, trombón, tuba... e moita imaxinación. Pasámolo moi ben.

NOVA TANDA DE PRESENTACIÓNS

2009-03-18T17:57:00.005+01:00

Rematou o período de elaboración e preparación e xa estamos na segunda tanda de presentacións do curso. O nivel amosado polos primeiros participantes resultou moi alto e iso que isto non fixo máis que comezar. Saben que son avaliados con cariño e rigor polos compañeiros pero a súa estupenda profesionalidade mantén os nervios a raia.
Na imaxe podemos ver un momento da intervención de Eva Pita e Jean na que amosaban o seu traballo de investigación sobre os Axentes xeolóxicos.

Nota: As presentacións xa avaliadas na clase pódense ver nun blog novo. Clicade no enlace que hai a continuación ou mirade en "Blogs amigos".

Enlace

SAÚDO DESDE A CORUÑA

2009-03-17T16:40:00.007+01:00

Hai uns días recibimos un saúdo afectuoso desde o CEIP Emilia Pardo Bazán da Coruña (Os Rosales). O saúdo nolo envían desde o blog AULA BLOGUE que elaboran os alumnos de infantil e a súa profe María. Para poder velo dirixídevos ao apartado "Blogs amigos". Estades invitados a deixarlles algún comentario.
Son tamén deste colexio os blogs: TICTICTIC e FACEMOS MÚSICA. Non teñen desperdicio ningún deles. O blog que falta, da nosa lista actual, chámase ENREDANDO e pertence ao CEIP Sanjurjo de Carricarte. O Constrúen os alumnos de quinto e a súa profesora Natalia. Tamén estades invitados a deixarlles algún comentario.

VISITA AO PARLAMENTO DE GALICIA

2009-03-17T16:22:00.004+01:00

O día 16 de marzo os alumnos de sexto tivemos a oportunidade de visitar e coñecer o Parlamento de Galicia. Alí sentámonos nos escanos dos nosos representantes, os que eliximos o pasado día 1. Aprendimos a diferenciar o seu labor (facer leis, controlar ao goberno autónomo e elixir ao Presidente da Xunta) do labor do goberno galego que é o de ter proxectos para Galicia e tratar de que o benestar dos galegos sexa cada día mellor. O hemiciclo (lugar onde debaten e deciden) resultou impresionante, estabamos no lugar máis emblemático da democracia de Galicia.

REPASANDO FRACCIÓNS

2009-03-13T17:41:00.003+01:00

Para os que aínda andan algo frouxos coas fraccións aí vai unha páxina de repaso.

Enlace

STELLARIUM

2009-03-12T21:12:00.010+01:00

O curso pasado tivemos a oportunidade de realizar varios exercicios de Astronomía utilizando o estupendo programa Stellarium. Este programa desde entón mellorou moito e xa vai pola versión 10.2 (o ano pasado usabamos a versión 8.2). Os interesados podedes baixar o programa desde a súa páxina oficial. Para chegar a ela, clicade sobre o enlace que está debaixo da imaxe.

Lembrade que este ano é o ano da ASTRONOMÍA.

Enlace

OITO DE MARZO, DÍA DA MULLER

2009-03-08T20:11:00.006+01:00

Gostaríame que non houbese un día da muller, significaría que todos (homes e mulleres) teríamos iguais dereitos e deberes en todo o mundo; que un mesmo traballo sería pagado de igual xeito a unhas e outros e que as responsabilidades do fogar(as que tanto nos costan aos homes) como os traballos domésticos, a crianza e educación dos fillos e o coidado dos velliños, estarían repartidas, definitivamente, por igual.

APRENDENDO A ESTUDAR

2009-03-02T19:37:00.008+01:00

Xa estamos rematando sexto e xa se ve moi cerca a vosa entrada no instituto. Profundizar nos hábitos de traballo seravos de moita axuda para iniciar esta nova etapa. Adquirir habilidades relacionadas co estudo será moi estimable.

Nesta páxina, que encontrou Silvia, podedes atopar moitas estratexias e exercicios que vos axudarán. Algunhas son para rapaces maiores, pero outras están moi indicadas para vós. Botádelle unha ollada, está moi ben feita.

Enlace

CARNAVAL, CARNAVAL...

2009-02-27T10:29:00.003+01:00

O pasado día 20 celebramos no colexio a festa do entroido. A nosa clase escenificou un desfile olímpico con atletas, xuíces, portador da antorcha... Saíunos moi ben. Aquí podedes ver un momento do desfile.

UN OVNI NO CEIP VALLE - INCLÁN

2009-02-25T02:33:00.002+01:00

Un extrordinario acontecemento tivo lugar no CEIP Valle - Inclán de Perillo. Un obxecto extraño posouse no patio durante o horario escolar. Os periodistas de sexto cubriron puntualmente a noticia.

Get your own - Open publication

DÍA DA PAZ

2009-02-08T16:51:00.007+01:00

Hai uns días celebramos no colexio o Día da Paz. Na nosa clase estudiamos a figura de Gandhi. Un insignificante home fronte a todo o imperio británico. Soubemos da súa enorme forza baseada nunha firme vontade e, sempre, en métodos pacíficos.
A Paz (a boa convivencia) é un ben que debemos coidar tódolos días do ano. Aquí tedes un vídeo sobre o Guernica, o famosísimo cadro de Picasso (lembrade que o ano pasado estivemos nunha exposición de retratos feitos por este pintor). O Guernica foi pintado por Picasso durante a guerra civil española (1936-1939). Picasso estaba horrorizado polo bombardeo que se fixo de Guernica (un pobo vasco) onde morreu moita poboación civil. Xa sabedes: maiores, mulleres, nenos.... Picasso tratou de plasmar nas figuras do cadro todo o terror e angustia que sufriron.

NOVA PROFESORA NO CEIP VALLE-INCLÁN

2009-02-04T15:45:00.009+01:00

Este mércores estreouse en 6ºA unha nova profesora. A profe Sofía explicounos moi clariño como hai que facer para multiplicar e dividir fraccións. A profe mostrouse esixente. Non nos permitíu despistarnos. Tivemos que estar moi atentos ás súas explicacións e logo facer os exercicios. Ata os máis inquedos tiveron que poñerse as pilas.

2009, ANO DA ASTRONOMÍA

2009-01-12T20:47:00.000+01:00

O ano 2009 foi considerado o ano da astronomía. Nesta páxina que vos propoñemos visitar, poderedes atopar respostas a moitas das preguntas que vos facedes sobre o Sistema Solar e o Universo.
Enlace

VIDEOS RECOMENDADOS SOBRE A ACTIVIDADE INTERNA DO PLANETA

2008-12-10T23:35:00.005+01:00

Neste visor poderás ver videos relacionados co movemento dos continentes (Teoría de Wegener e Teoría de Placas)e coa actividade interna do planeta.

AS MÁQUINAS SIMPLES

2008-12-09T18:57:00.000+01:00

Video explicativo das máquinas simples. As máquinas simples utilizámolas dende hai moito tempo pero siguense a usar actualmente xa que moitas das máquinas que empregamos hoxe son combinacións de varias máquinas simples.